ტიერი ანრი, რომელმაც გუშინ ევროპული ფეხბურთი დატოვა და "ნიუ იორკ რედ ბულზს” მიაშურა, ამიერიდან საფრანგეთის ეროვნულ ნაკრებში აღარ ითამაშებს. 32 წლის ფეხბურთელმა ნაკრებიდან წასვლის შესახებ განცხადება დღეს გააკეთა.
"სამხრეთ აფრიკასთან გამართული მატჩი ჩემს სანაკრებო კარიერაში ბოლო იყო” – ციტირებს ანრის სიტყვებს AP. ანრიმ ეს გადაწყვეტილება იმით ახსნა, რომ მას აწი ამერიკიდან ევროპაში ნაკრებში სათამაშოდ ჩამოსასვლელად არც დრო ექნება არც სურვილი.
13-წლიანი სანაკრებო კარიერის მანძილზე ტიერი ანრიმ ქვეყნის პირველ გუნდში 123 მატჩი გამართა და 51 გოლი გაიტანა. გატანილი გოლების მხრივ იგი ნაკრების ისტორიაში საუკეთესოა. საფრანგეთის ნაკრებთან ერთად ანრიმ მსოფლიოს ჩემპიონატი (1998 წელს), ევროპის ჩემპიონატი (2000) და კონფედერაციის თასი (2003) მოიგო.