აფხაზეთის ომის გმირის, ვახტანგ გორგასლის პირველი ხარისხის ორდენოსნის, ზაზა ბენდელიანის სახელობის ტრადიციული ტურნირი, ურეკში საწვრთნელ შეკრებაზე მყოფი ცხინვალის "სპარტაკისა” და მარტვილის "მერანის” მატჩით დაიწყო. სხვათა შორის, "სპარტაკი” ერთადერთი გუნდია "ბენდელას თასზე” მონაწილე უმაღლესლიგელთაგან, რომელიც ძირითადი შემადგენლობით იასპარეზებს. შეგახსენებთ, რომ მიმდინარე გათამაშება, მისი წინამორბედისგან განსხვავებული ფორმატით ტარდება. ჯერ ერთი, გუნდები სტანდარტული ზომის მინდორზე ითამაშებენ; მეორეც ის, რომ არცერთი მატჩში საბოლოო შედეგად ფრე არ დაფიქსირდება. თუ ძირითადმა დრომ გამარჯვებული ვერ გამოავლინა, მსაჯი მოწინააღმდეგეებს პენალტების სერიაში შეაჯიბრებს. ამ პრინციპით მოგებული გუნდი კი, მხოლოდ 2 ქულას მიითვლის. და ერთიც, ქულების დარიცხვის პრინციპზეც - დიდი ანგარიშით (3 და მეტი ბურთის სხვაობით) მომგები გუნდის აქტივს 3-ის ნაცვლად, 4 ქულა მიემატება. მატჩისშემდგომი პენალტების სერია, აქტუალური ტურნირის გახსნის მატჩშივე გახდა. "სპარტაკმა” და "მერანმა”, არაერთი მცდელობის მიუხედავად, გოლის გატანა ვერ შეძლეს და საქმეც საფეხბურთო ლატარეამდე მიიყვანეს. აქ კი, უფრო იღბლიანები ცხინვალელები აღმოჩნდნენ - იმის გარდა, რომ "სპარტაკის” დამრტყმელებმა მხოლოდ ერთი პენალტი გააცუდეს (შეროზიამ ბუზალაძეს აუღო), მოწოდების სიმაღლეზე იყო სოსო გრიშიკაშვილი. ცხინვალელთა გამოცდილმა კიპერმა, მეტოქეს 2 პენალტი აუღო, ერთხელ კი, მარტვილელს მიზანმა უმტყუნა და კარს ააცილა. როგორც "მსოფლიო სპორტისთვის” გახდა ცნობილი, ცვლილება განიცადა ტურნირის ერთ-ერთი მონაწილის ვინაობამ. კერძოდ, რეგიონალლიგური ხაშურის "ივერია”, რომელსაც იმავე "ა” ჯგუფში უნდა ეასპარეზა, სადაც ორგანიზატორებმა "სპარტაკი” და "მერანი” "ზესტაფონთან” და თსუ-სთან ერთად გაამწესეს, ქართულ საფეხბურთო რუკაზე ახალგამოჩენილმა სუბიექტმა ჩაანაცვლა. "ბენდელას თასის” ორგანიზატორებმა, გათამაშებაზე რევაზ ძოძუაშვილის საერთაშორისო საფეხბურთო აკადემიის გუნდი დაუშვეს.
აფხაზეთის 
