ესპანეთის მოქმედმა ჩემპიონმა, კატალონიის „ბარსელონამ" გათამაშების მე-2 წრე ისევე დაიწყო, როგორც პირველი - პეპ გვარდიოლას გუნდმა „რასინგი" ამჯერადაც 3:0 გაანადგურა. როგორც პირველი ტურის მატჩში, კატალონიელებმა ანგარიში ამჯერადაც მე-2 წუთზე გახსნეს. დამთხვევა ასევე ის იყო, რომ სანტანდერელთა კარში გოლები გაიტანეს ლიონელ მესიმ და ანდრეს ინიესტამ. განსხვავება ისაა, რომ პირველ ტურში გოლის გამტანი დავიდ ვილია ამჯერად პედრო როდრიგესმა ჩაანაცვლა.
სწორედ პედრომ გახსნა ანგარიში მე-2 წუთზე ცარიელ კარში გატანით, მაგრამ უნდა აღინიშნოს, რომ მესის გადაცემის დროს, „ბარსას" მე-17 ნომერი თითქოს თამაშგარე მდგომარეობაში იმყოფებოდა. 33-ე წუთზე, მესიმ თავად გაიტანა გოლი, გამოიყენა რა დავიდ ვილიას მიერ გამომუშავებული თერთმეტმეტრიანი. შეხვედრას წერტილი ინიესტამ დაუსვა, რომელმაც მასპინძლების ძალზე კარგი კომბინაციის შემდეგ, 17 მეტრიდან დარტყმით აიღო მეტოქის კარი.
სამბურთიანი სხვაობით იმარჯვა მასპინძლად მოთამაშე კიდევ ერთმა გუნდმა. „სევილიამ" „ლევანტე" გაანადგურა და 3 საფეხურით წინ წაიწია. გრეგორიო მანსანოს გუნდიდან თავი ჰეთ-თრიკით ლუიშ ფაბიანუმ გამოიჩინა, ერთი გოლიც სტუმრებს ესკუდემ გაუტანა. ვალენსიელთა მხრიდან, პრესტიჟის გოლის გატანა ჩისკომ ითავა.
დღის ყველაზე საინტერესო მატჩი ვალენსიაში გაიმართა. ადგილობრივი გუნდი მანუელ პელეგრინის „მალაგას" მასპინძლობდა და ფავორიტადაც ითვლებოდა. „ღამურებს" 3 ქულის მოპოვება განსაკუთრებით იმის გათვალისწინებით უნდა გაადვილებოდათ, რომ მატჩის მიმდინარეობისას, სტუმართა 2 ფეხბურთელი გააძევეს მოედნიდან, მაგრამ უნაი ემერის შეგირდებს მაინც გვარიანი ოფლისღვრა მოუწიათ შედეგის მისაღწევად. ანგარიში სტუმრებმა გახსნეს, მე-10 წუთზე, რონდონის ზუსტი დარტყმით. 5 წუთში, საკუთარ საჯარიმოში წესების დარღვევისთვის დემიკელისს მოედანი დაატოვებინეს, რასაც მატას მიერ თერთმეტმეტრიანის ზუსტად შესრულება მოჰყვა. 35-ე წუთზე, უკვე კაცნაკლული სტუმრები რონდონმა კიდევ ერთხელ დააწინაურა. მე-2 ტაიმის პირველმა ნახევარმა მასპინძელთათვის კარგად ჩაიარა. 53-ე წუთზე სოლდადომ ანგარიში გაათანაბრა, 65-ე წუთზე, მოედნიდან უკვე როსარიო გააძევეს, ხოლო 2 წუთში, ბანეგამ წინ მასპინძლები გაიყვანა. 79-ე წუთზე, მოედანზე 9 კაცით მყოფი სტუმრებისგან თავი ჟულიო ბაპტიშტამ გამოიჩინა, რომელმაც საჯარიმოს გარედან დარტყმით აიღო მასპინძელთა კარი. „ვალენსიას" მხსნელად ადურისი მოევლინა. 90-ე წუთზე, ესპანელმა შემტევმა სოლდადოს გადაცემა გამოიყენა და გუნდს ზედიზედ მე-5 თამაში მოაგებინა.
ესპანეთის მოქმედმა ჩემპიონმა, კატალონიის 
