ტოგოელი თავდამსხმელი, ემანუელ ადებაიორი სეზონის დარჩენილ ნაწილს
მადრიდის "რეალის" შემადგენლობაში გაატარებს. "სამეფო კლუბის" ოფიციალური
ვებ-გვერდის ინფორმაციით, ესპანურმა გრანდმა "მანჩესტერ სიტის" აფრიკელ
ფორვარდთან 6-თვიანი საიჯარო ხელშეკრულება გააფორმა. ამასთან, სეზონის
დასრულების შემდეგ, მადრიდელებს ადებაიორის კონტრაქტის გამოსყიდვის
პრიორიტეტული უფლება ექნებათ. ასე რომ, 2009 წლის ზაფხულში,
"არსენალისგან" 25 მილიონ ფუნტად შეძენილმა ტოგოელმა, "სიტის" რიგებში
მხოლოდ 18 თვე გაატარა. ადებაიორმა ადგილი "ქალაქელთა" ძირითად
შემადგენლობაში, რობერტო მანჩინის მისვლის შემდეგ დაკარგა. ჯერ კიდევ
ზაფხულში, როცა მანჩესტერელებმა მარიო ბალოტელი დაიმატეს, ნათელი გახდა,
რომ აფრიკელი თავდამსხმელი იტალიელი სპეციალისტის გეგმებში არ შედიოდა.
ცოტა ხნის წინათ კი, "სიტიმ" კიდევ ერთი მსოფლიო დონის ფორვარდი, ედინ
ჯეკო შეიძინა, რამაც ადებაიორის პერსპექტივა მიზერული გახადა. აქედან
გამომდინარე, "ქალაქელებს" ტოგოელთან განშორება არ გასჭირვებიათ. მადრიდის
"რეალი" კი, კვალიფიციურ თავდამსხმელს ერთი თვის განმავლობაში ეძებდა.
ესპანელებს ფორვარდის დამატების აუცილებლობა გონსალო იგუაინის დაშავების
შემდეგ გაუჩნდათ. ბოლო პერიოდმა აჩვენა, რომ "სამეფო კლუბის"
ხელმძღვანელობას, კარიმ ბენზემას იმედად ყოფნა ხეირს არ მოუტანს. ფრანგი
ფორვარდი აშკარად ვერ ამართლებს მასზე გაცემულ ავანსებს და საჭირო იყო
გამტანი ფორვარდის დამატება. "რეალის" შეფებს თავიდან რუუდ ვან ნისტელროის
გადაბირება სურდათ, მაგრამ "ჰამბურგის" მესვეურებისგან უარი მიიღეს.
შემდეგ კი, მადრიდელები 26 წლის ადებაიორის ვარიანტზე გადაერთვნენ და
"სიტისგან" იჯარაზე თანხმობა მალევე მიიღეს. როგორც ესპანური პრესა წერს,
ესპანურ გრანდს ტოგოელის დამატება 2 მილიონი ევრო დაუჯდა. ბოლოს
დავამატებთ, რომ ადებაიორს მანჩესტერელთა შემადგენლობაში ჩატარებულ 43
შეხვედრაში, 19 გოლი აქვს გატანილი. "რეალის" რიგებში მისი დებიუტი
სავარაუდოდ, კვირას, "ოსასუნასთან" გასვლით შეხვედრაში შედგება.
ტოგოელი თავდამსხმელი, ემანუელ ადებაიორი სეზონის დარჩენილ ნაწილს
მადრიდის "რეალის" შემადგენლობაში გაატარებს. "სამეფო კლუბის" ოფიციალური
ვებ-გვერდის ინფორმაციით, ესპანურმა გრანდმა "მანჩესტერ სიტის" აფრიკელ
ფორვარდთან 6-თვიანი საიჯარო ხელშეკრულება გააფორმა. ამასთან, სეზონის
დასრულების შემდეგ, მადრიდელებს ადებაიორის კონტრაქტის გამოსყიდვის
პრიორიტეტული უფლება ექნებათ.
