უფლისაგან
ნაბოძები ათი მცნებიდან, მეშვიდე მცნება – "არ იმრუშო” კრძალავს
არაკანონიერ ურთიერთობას კაცსა და ქალს შორის. თუმცა, დღეს ეს მცნება
თითქოს მოძველებულია, საჭოროებასაა მოკლებული და მის შესრულებასაც
ნაკლებად ცდილობენ. თანამედროვე ცხოვრების წესმა საფუძველი შეურყია ე.წ.
"ქალიშვილობის ინსტიტუტს”. თუ ადრე ოჯახები ამ პრინციპით იქმნებოდა და
არაქალიშვილის ცოლად შერთვა, თუ ის განათხოვარი არ იყო, დიდ სირცხვილად
ითვლებოდა, დღეს ამას ყურადღებას არავინ აქცევს.
"ამბიონი” ამ საკითხის თაობაზე მოძღვარსა და რამდენიმე ახალგაზრდას გაესაუბრა.
გიორგი
დევდარიანი (სტუდენტი): "ქორწინებამდე კავშირი იმ შემთხვევაში მიმაჩნია
გამართლებულად თუ შეყვარებულ წყვილს მთელი ცხოვრების ერთად გატარება
საბოლოოდ აქვთ გადაწყვეტილი. ევროპელები ქორწინებამდე რამდენიმე წელი
ერთად ცხოვრობენ. თუ ადამიანი მიყვარს და გადავწყვიტეთ ერთად ვიცხოვროთ,
ამაში ცუდს ვერ ვხედავ. იცხოვრებ ერთი-ორი წელი და მერე დაიწერ ჯვარს.
სხვაა, როცა ადამიანს სხვადასხვა ადამიანებთან ჰქონდა სუქსუალური კავშირი,
თუნდაც ეს სიყვარულის საფუძველზე. ჩემთვის წარმოუდგენელია როგორ შეიძლება
შემიყვარდეს მსგავსი ტიპის ადამიანი”.
მარიამ მჭედლიძე (სტუდენტი):
"ქორწინებამდე კავშირი დაუშვებელია, შეიძლება ერთ ან ორ ადამიანთან
გქონდეს რომანი, მაგრამ მხოლოდ კოცნით შემოიფარგლებოდეს ყველაფერი.
საქართველოში მამაკაცების ნაწილი მიმბაძველობით გამოირჩევა, ამბობენ,
თითქოს ეს საკითხი უმნიშვნელოა, მაგრამ საბოლოოდ 90% მაინც აქცევს
ყურადღებას ქალიშვილობას. გარდა იმისა, რომ მორწმუნე ადამიანისთვის
ქორწინებამდე კავშირი მიუღებელია, მორალი არ მაძლევს ამის უფლებას”.
მამა
დავითი ქალებაშვილი (ღვთისმშობლის შობის ეკლესიის მოძღვარი): "მცნება –
"არ იმრუშო” ღვთისაგან არის მოცემული. ჯვრისწერის საიდუმლოს აღსრულებისას
წყვილებს გვირგვინები ედგმებათ თავზე, რაც ნიშნავს, რომ მათ უბიწოდ
შეინახეს თავი ამ საიდუმლომდე. ის აზრი, რომ ჯვრისწერამდე ფიზიკურ
ცხოვრებაში ცუდი არაფერია, რა თქმა უნდა, მცდარია და ღვთის მცნების
დარღვევაა. რაც ნიშნავს, რომ ადამიანი ვერ ცხოვრობს, ვერ ითავისებს,
არაფრად მიიჩნევს უფლის სიტყვებს. როდესაც ადამიანი გააცნობიერებს, რას
ითხოვს ღმერთი მისგან, თავისდავად მიხვდება რას ნიშნავს ეს.
ძველი
აღთქმის თანახმად, ვინც იმრუშებდა, იუდეველები ქვებით ქოლავდნენ, ეს
მაშინ, როცა უფალი დიდ სულიერ სიმაღლეს არ ითხოვდა. ახალი აღთქმით კი,
მაცხოვარი არა თუ მრუშობას, გულისთქმით შეხედვასაც კი სჯის, მეტ
სისპეტაკეს ითხოვს ჩვენგან და როცა ადამიანი ამას ყურადღებას არ აქცევს,
ის უკვე ცხოველის დონეზეა. მემრუშე ადამიანები თავიდანვე ნაკლოვანები
არიან და არ არიან სრულყოფილები, ეს უკვე სულიერი დაღია.
წარმართულ
სამყაროში იყო ასეთი ტაძარი, სადაც ყველა ქალი ვალდებული იყო ემრუშათ, მათ
ამისათვის სიმბოლურ თანხას აძლევდნენ, რომელიც ისევ "ტაძრისთვის
იწირებოდა”, და იგივე ეს ტაძრები, ადამიანებმა თავიანთ თავში ააგეს.
თუ
ძველად მემრუშეებს ცხვირს აჭრიდენ, ვირზე უკან აჯენდნენ და ისე
ატარებდნენ, ხეების კენწეროებს მოზიდავდნენ და ერთ კენწეროზე ერთ ფეხს
მიაბამდნენ, მეორეზე კი მეორეს და ისე ხლეჩდნენ, ახლა პირიქით, მემრუშეები
დიდად პიტივისცემული ხალხი არიან, ახლა უსჯულოება მისაბაძია და მისი
განდიდება ხდება. დღეს დასაცინი ხდება ადამიანი, რომელიც არ არის
შებილწული და უბიწოებადაკარგული. ასეთი ადამიანი ნეტარია და ბედნიერს
უწოდებს მას მაცხოვარი. ღვთის ხატად შექმნილი ადამიანი ხშირად ცხოველის
დონეზე დადის და ამ სიცხოველეს ადამიანი ტაშს უკრავს, ნაცვლად იმისა, რომ
გაკიცხოს. ეს დაცემის კიდევ ერთი სახეა.
ადამიანი, რომელიც ამბობს,
მნიშვნელობა არ აქვს ამ ცოდვას, ის მხოლოდ გარეგნულადაა ქრისტიანი. ასეთი
აზრები, ყველა ეკლესიური ცხოვრების მიღმა მყოფი ადამიანის აზრებია,
რომელსაც სხვებსაც თავს ახვევენ. ეკლესია ღვთის სიტყვაზე ეფუძნება, ოჯახის
შექმნისათვის ღვთის კურთხევაა საჭირო. ოჯახი ხომ მთელი ცხოვრების ტვირთია,
რომელიც ღვთის წინაშე უნდა მოიტანო. შეიძლება ყველაფერი მოხდეს, ადამიანს
გონება დაუბნელდეს, დაეცეს, მაგრამ ღვთის შეწევნით შეუძლია შეინანოს და
დაიწეროს ჯვარი. არის სინანულის საიდუმლო, წყვილს სასჯელი დაედება და
შესრულების შემთხვევაში, მიეტევება ჩადენილი ცოდვა.
მიზეზი იმისა
თუ რატომ შეიცვალა ადამიანის ამ საკითხისადმი დამოკიდებულება, არის
მასობრივი ინფორმაციის საშუალებებიდან და ინტერნეტიდან გადმოდენილი ვნება,
გარყვნილება. მიზეზია ისიც, რომ ადამიანები არ ცხოვრობენ ეკლესიურად,
მოზარდებში კი მშობლები არ არიან ფრთხილები.
თუ სახელმწიფოს სურს,
ჯანსაღი, ზნეობრივად ამაღლებული საზოგადოება, ეკლესიას გვერდით უნდა
დაუდგეს. აკრძალოს უზნეო ფილმები, ჟურნალები და დადგნეს სადარაჯოზე და
არა, პირიქით. თუ ასე არ იქნება, ადამიანი ღირებულს ვერაფერს შექმნის,
ყოველივე გაქრება”.
