იტალიაში, განვლილი საფეხბურთო წელიწადი შეაჯამეს. სერია A-ს საუკეთესო
მოთამაშედ, "ინტერის" არგენტინელი თავდამსხმელი, დიეგო მილიტო დასახელდა.
შეგახსენებთ, რომ სამხრეთამერიკელმა ფორვარდმა, იტალიის განვლილი
პირველობის 35 შეხვედრაში, 22 გოლის გატანა მოახერხა, რითაც მნიშვნელოვანი
წვლილი შეიტანა "ნერაძურის" გაჩემპიონებაში. მილანში გამართულ
"საფეხბურთო ოსკარზე", მილიტომ კიდევ ერთი პრიზი მიიღო - 31 წლის
არგენტინელი, სერია A-ს საუკეთესო უცხოელად მიიჩნიეს. როგორც
მოსალოდნელი იყო, წლის საუკეთესო გუნდად, განვლილ სეზონში 5 ტიტულის
(ჩემპიონთა ლიგა, საკლუბო მსოფლიოს ჩემპიონატი, იტალიის ჩემპიონატი, თასი
და სუპერთასი) მომგები "ინტერი" აღიარეს, ხოლო მისი ყოფილი თავკაცი, ჟოზე
მოურინიო საუკეთესო მწვრთნელად დაასახელეს. "ნერაძურის" ფეხბურთელებმა
კიდევ 3 ინდივიდუალური ჯილდო მიიღეს. წლის ყველაზე ლამაზ გოლად, დუგლას
მაიკონის მიერ "იუვენტუსის" კარში გატანილი გოლი მიიჩნიეს. წლის საუკეთესო
მეკარედ, კვლავ "ინტერის" კიპერი, ჟულიო სეზარი აღიარეს, ხოლო საუკეთესო
მცველის ტიტული ერთმანეთში ვალტერ სამუელმა და ტურინელმა ჯორჯო კიელინიმ
გაიყვეს - ორივე უკანახაზელმა გამოკითხვაში ხმების თანაბარი რაოდენობა
მიიღო. განვლილი სეზონის საუკეთესო იტალიელ ფეხბურთელად, "უდინეზეს"
ბომბარდირი ანტონიო დი ნატალე დაასახელეს. მასვე ერგო სპეციალური პრემია -
"მოთამაშე ფეირ-პლეი". ჩემპიონატის საუკეთესო ახალგაზრდა
ფეხბურთელისთვის განკუთვნილი ჯილდო "პალერმოს" არგენტინელმა
ნახევარმცველმა, ხავიერ პასტორემ მიიღო. წლის აღმოჩენად, "ნაპოლის"
ურუგვაელი თავდამსხმელი, ედისონ კავანი აღიარეს, რომელმაც განვლილი სეზონი
"პალერმოს" შემადგენლობაში გაატარა. მსაჯებს შორის საუკეთესოდ კი, ემიდიო
მორგანტი დაასახელეს.
იტალიაში, განვლილი საფეხბურთო წელიწადი შეაჯამეს. სერია A-ს საუკეთესო
მოთამაშედ, "ინტერის" არგენტინელი თავდამსხმელი, დიეგო მილიტო დასახელდა.
შეგახსენებთ, რომ სამხრეთამერიკელმა ფორვარდმა, იტალიის განვლილი
პირველობის 35 შეხვედრაში, 22 გოლის გატანა მოახერხა, რითაც მნიშვნელოვანი
წვლილი შეიტანა "ნერაძურის" გაჩემპიონებაში.
