"ატლანტა ჰოუკსს” ტრავმის გამო დომინიკელი ალ ჰორფორდი ვერ ეხმარება. როდესაც ჯორჯიელთა სასტარტო შემადგენლობის ტრავმის თაობაზე შევიტყვეთ, ვივარაუდეთ, რომ გუნდის მწვრთნელი ლარი დრიუ ზაზა ფაჩულიას დააყენებდა ძირითად ხუთეულში, მაგრამ თავდაპირველად, დამრიგებელმა "ჩვენი რჩევა ყურად არ იღო” და მწარედ დაისაჯა კიდეც. გუშინ გამთენიისას "ჰოუკსმა” საკუთარ არენაზე გამანადგურებელი მარცხი იწვნია "ნიუ ორლეან ჰორნეთსთან” და საკუთარი ანტირეკორდიც დაამყარა. დღეს სისხამ დილით კი "ქორები” შარლოტში "ჩაფრინდნენ” და იქაური "ფოცხვერები” "დაკორტნეს” – 103:87. კალათბურთის ქართველი გულშემატკივრებისთვის კი ყველაზე მეტად გასახარი ის მომენტია, რომ ეროვნული საკალათბურთო ასოციაციის მიმდინარე რეგულარულ ჩემპიონატში საქართველოს ნაკრების კაპიტანი ატლანტელთა სასტარტო შემადგენლობაში პირველად გამოჩნდა და "ბობქეთსის” დამარცხებაში მნიშვნელოვანი წვლილი შეიტანა. ზაზამ შარლოტის Time Warner Cable Arena-ზე 28 სათამაშო წუთი გაატარა და ორმაგ დუბლამდე მცირედი დააკლდა. ფაჩულიამ 9 ქულას (5-დან 3 ზუსტი ორქულიანი და 4 მცდელობიდან წარმატებული 3 საჯარიმო ტყორცნა), 8 მოხსნა მიამატა, ამასთან პარტნიორს შედეგიანი გადაცემაც გაუკეთა და "ბობქეთსს” შეტევისას ბურთი ორჯერ ჩაუჭრა. ერთი სიტყვით, ქართველი მეფარე ამ დილით პარკეტზე ერთ-ერთი საუკეთესო გახლდათ. თანაგუნდელებში მან ყველაზე მეტი მოხსნა განახორციელა, შედეგიანობით კი, ჯორჯიელთაგან ჯო ჯონსონი გამოირჩა, 32 ქულით.
"ატლანტა ჰოუკსს” ტრავმის გამო დომინიკელი ალ 
